Թույլ տվեք որ մանուկները ինձ մոտ գան...
Մարկոսի Ավետարանի 10․13-15-ի մեջ ,,Ժողովրդից ոմանք մանուկներ բերին Հիսուսի մոտ, որպեսզի ձեռքը դնի նրանց վրա, բայց աշակերտները սաստեցին բերողներին:
Երբ Հիսուս տեսավ, բարկացավ և սաստեց աշակերտներին՝ ասելով․ ,,Թույլ տվեք որ
մանուկները ինձ մոտ գան, արգելք մի՛ եղեք նրանց, որովհետև այդպիսիններինն է Աստծո
արքայությունը,,։
1929-ին Կիլիկիո Սահակ Բ․ Ղապայան Կաթողիկոսը․ ցեղասպանությունից փրկված և տարագրված հայազգի զավակներին (ովքեր Լիբանանի և Սիրիայի մեջ ցիր ու ցան մնացորդացն էին կազմում) հավաքելու միակ ձևը գտնում էր Քրիստոսի և Հայ Եկեղեցու շուրջ հավաքելու մեջ․ Եվ ահա հիմնում է Կիրակնօրյա դպրոցները, քանի որ, իր բառերով ասած․ «Չենք կարող թոյլ տալ որ հայ մատաղ սերունդը հակակրօն գաղափարներով դաստիարակուի»։ Եվ սրան ավելացնում է․ «Մենք յայտնի կերպով կը տեսնենք թէ ի՛նչպիսի ողբալի վիճակի մը մէջ ինկած է Աւետարանի
լոյսէն, կրօնքի սրբարար շնորհքէն զրկուած հայ երիտասարդութիւնը: Մենք կ’ուզենք որ մեր Մայրենի Եկեղեցւոյն զաւակները հարազատ զաւակները ըլլան իրենց Ընտանիքին, իրենց Ազգին, եւ իրենց Եկեղեցւոյն:...Վերջապէս չենք ուզեր որ անկրօն եւ տգէտ մեծնայ հայ ժողովուրդի երիտասարդ սերունդը: Մանուկները, Յիսուսի կարենալ երթալու համար 2 բանի պէտք ունին.
1. մայր մը որ զիրենք Յիսուսի ուզէ տանիլ,
2. եւ մէկը որ արգելքները վերցնէ:
Հայ Մայրը, որպէսզի իր զաւակը Յիսուսի տանի, պէտք է հաւատայ, որ որպէս Հայ, ասիկա իր իրաւունքն է, որովհետեւ որպէս հայ մայր, ասիկա իր պարտքն է ու իրաւունքը որ շահած է,
ա. Թադէոս եւ Բարթողոմէոս Առաքեալներու նահատակութեամբ,
բ. Սուրբ Գրիգոր Լուսաւորչի չարչարանքներով,
գ. Սահակ-Մեսրոպ-Վռամշապուհի իմաստութեամբ, երազով եւ քրտինքով,
դ. Աւարայրի հերոսներու արիւնով եւ
ե. Նուարսակի Դաշնագրի ստորագրութեամբ»։
Հայ մանուկին Քրիստոսին մոտեցնելու բարի մղումներով է, որ նաև նորանկախ Հայաստանի Հանրապետությունում 1991 թվականին Մայր Աթոռ Սուրբ Էջմիածնի Քրիստոնեական Դաստիարակության և Քարոզչության Կենտրոնը ազնիվ ջանքերով մի խումբ միաբանների, որոնցից Տ. Միքայել եպս.
Աջապահյանը, Տ. Վազգեն եպս. Միրզախանյանն ու Տ. Սեպուհ եպս. Չուլջյանն այսօր թեմակալ
առաջնորդներ են, - ձեռնարկեց Կիրակնօրյա մի շարք հոգևոր դպրոցների հիմնադրումը: Մի
քանի տարիների ընթացքում Հայաստանում արդեն կային 100-ից ավել կիրակնօրյա դպրոցներ,
որտեղ հազարավոր հայ մանուկներ քրիստոնեական կրթություն էին ստանում` աշակերտելով մեր
Տեր Հիսուս Քրստոսին: Նրանցից շատեր հետագայում ընդունվեցին Հոգևոր ճեմարաններ և համալրեցին
հայ հոգևորականների բանակը:
2000-ական թվականներին, երբ «Հայ
Եկեղեցու պատմություն» առարկան սկսվեց դասավանդվել ՀՀ հանրակրթական
դպրոցներում և քրիստոնեական կրթությունը համատարած դարձավ, մեր կիրակնօրյաները, թվում է կորցրեցին իրենց ընթացքի երբեմնի թափը, սակայն նրանցից շատեր շարունակում են իրենց եկեղեցանվեր և աստվածասեր ծառայությունը այսօր էլ` դաստիարակելով քրիստոնյա աստվածավախ հայորդիներ:
«Թույլ տվեք որ մանուկները ինձ մոտ գան»
Սահակ
հայրապետն՝ իր իմաստությամբ, Տեր Հիսուսի այս խոսքը որպես նշանաբան ունենալով, մեկ
նախադասությամբ աղերսում էր հայ մայրերին, որ իրենց զավակներին Քրիստոսին մոտեցնեն
և Քրիստոսի խոսքով սաստում էր բոլոր նրանց,
ովքեր տարբեր ձևերով արգելք էին, որ հայ ազգի մանուկները մոտենան Աստծուն։
Սիրելի
ծնողներ, այս նույն աղերսը մենք ունենք ձեզ այսօր․ թույլ տվե՛ք և ուղղորդե՛ք ձեր
բալիկներին մեր Կիրակնորյա դպրոցներից որևէ մեկը, ուր նրանք կստանան քրիստոնեական
դաստիարակություն մայր Եկեղեցու և մեր խնամքի ներքո,հեռու կմնան հոգեկործան և
քայքայիչ աղանդներից, կմեծանան որպես ազնիվ, ծնողասեր, հայրենասեր ու հայրենատեր,
աստվածասեր ու աստվածավախ քաղաքացիները մեր երկրի։
Ամեն
մեկս ինքներս մեզ հարց տանք՝ մենք ո՞ր խմբին ենք պատկանում։ Նրանց, որ իրենց
զավակների Քրիստոսին են մոտեցնում, թե՞ նրանց, որ ոչ միայն չեն մոտեցնում, այլև
արգելք են լինում նրանց, ովքեր ուզում են իրենց զավակներին Քրիստոսին մոտեցնել։
,